عاوز تفرح خش عندنا

منتدى مزيكاتيا ...أكبر تجمع عربى و انجليزى


    تامر حسنى فى ميدان التحرير يؤدى واجبه نحو بلده وشباب بلده

    شاطر
    avatar
    Youssef ElMohandes
    الرئيس الكبير
     الرئيس الكبير

    الجنس : ذكر
    عدد المساهمات : 230
    تاريخ الميلاد : 06/06/2000
    تاريخ التسجيل : 19/04/2010
    العمر : 17
    المزاج : المنتديات
    نقاط : 27958064
    السٌّمعَة : 0

    default تامر حسنى فى ميدان التحرير يؤدى واجبه نحو بلده وشباب بلده

    مُساهمة من طرف Youssef ElMohandes في الأربعاء فبراير 09, 2011 3:35 am

    فاكرين اول ما بدات المظاهرات والثوره ديه كلنا قولنا ايه؟

    كلنا قولنا شويه عيال بيلعبوا

    شويه شويه بدائنا نغير وجهه نظرنا ونقول لا والله الشباب ديه ممكن تعمل حاجه وهننزل وهنشاركهم

    الجزيره والعربيه والبى بى سى ومليون قناه ضللت الشعب المصرى وكانت بتجيب حاجات تقلب الدنيا ومبينه ان مصر خلاص بتنتهى وهى لسه بتبتدى

    بتبتدى عصر الحريه وعصر الرأى الشعبى عصر كتبناه احنا الشباب عملنا اللى اهالينا مقدروش يعملوه فى 30 سنه احنا عملناه فى اقل من اسبوع

    تامر فى اول مكالمه ليه لما قال انه مع مبارك وانه ضد اللى بيحصل دة اظن ان كان كلامه واضح انه خايف على البلد

    وبعد كدة مع عمرو اديب طلع وقال كلام للاسف الناس فهمته على انه غير رائيه

    يا جماعه هو فى حد بيختلف على ان مبارك دة بطل؟ اظن محدش والناس اللى بتقول عليه غير كدة تبقى ناكره لـ جمايل الراجل دة

    تامر حس بـ سوء الفهم اللى حصل وحب ينزل مع الناس مش علشان الراى العام ولا علشان ناس طلبوا منه كدة

    تامر لما نزل التحرير من ساعات نزل علشان هو مصرى ونفسه يغير بلده نفسه يقول للناس انا معاكوا حس ان الناس لما تشوفه هتفرح ويحسوا ان الناس بتأيدهم

    بس انا عندى سؤال بقى

    الناس اللى حاولوا يتعدوا عليه فى التحرير دول عرفوا منين وهما بقالهم اكتر من 10 ايام فى التحرير ان هو طلع وقال انا بحترم حسنى مبارك؟

    ناس بقالهم 10 ايام برا بيوتهم يمكن اللى بيحصل ان يروحوا ساعتين كل يومين تلاته يغيروا هدومهم وينزلوا يكملوا مظاهرات تانى

    هيبقوا فاضيين بقى ويشوفوا مين بيقول ايه وفولان عمل ايه؟

    تفتكروا دة كلام يصدقوا عقل

    واضح ان هما ناس مبعوتين مخصوص لما عرفوا ان تامر هينزل وواضح اوى من اللى حصل ان دول قاصدينه

    فين الفنانين اللى نزلت مع الشباب غير تامر

    اغلبيتهم ومع احترامى ليهم كلهم والله وطنين وبيحبوا البلد لكن نجوميتهم ماجتش واحد على ميه من نجوميه تامر

    لما فنان فى حجم تامر ينزل الميدان نفسه يقول للشباب انا معاكوا انا بحبكوا يلا ننقذ البلد سوا ويلا نقول للظلم لا

    نزلهم لوحده بدون حتى ما ياخد اخوه معاه ورفض ان اى حد ينزل معاه لانه ماكنش رايح حفله دة كان رايح لبلده

    الحوار من ساعات ولسه ولاقينا ناس بتقول تامر بيعمل شو وتامر بيعمل مش عارف ايه وبيعمل كل دة علشان يكسب الناس مش اكتر طيب انا هرد عليكوا بالمنطق وبالراحه

    واحد زى تامر لو حاسس انه فى خطر وحاسس ان فى ناس فاهماه غلط من الشباب دول وحاسس بـ قلق من ناحيتهم تفتكروا يعنى

    ماكنش قادر ينزل بـ جاردات؟

    اقل حاجه عند اى فنان تليفون لـ اكبر شركه جاردات فى البلد ينزله طقم جاردات وينزل بيه المظاهره وابقوا قابلونى لو حد قدر يلمسه

    دة طبعا غير المصورين سواء فيديو او فوتوغرافيا اللى هينزلوا معاه علشان يصوروا الشو الاعلامى اللى هو بيعمله

    دة غير الناس اللى هتبقى على النت عماله تنزل فى فيديوهات وتقول تامر هينزل وسون تامر فى ميدان التحرير


    عوامل كتيره اوى كان لازم تتوفر لو تامر فعلا نازل يعمل شو اعلامى وبيضحك على الناس فعلا زى ما بعض الناس بتقول

    لكن واح نازل لوحده قولنا يا تامر ننزل معاك قال لا انا نازل لـ اخواتى وهقف معاهم لوحدى انا رايح بصفتى مصرى مش لفنان

    مصرى رايح لـ اخواته المصريين اللى بيحبوه وبيحترموه واللى هما هما بنفسهم دخلوا على صفحاته ومواقعه وطلبوا منه انه ينزل معاهم

    وكلنا كنا بنقول عايزين تامر ينزل ويقول رايه صح ولا غلط؟

    تامر نزل وراح وحاولوا يضربوه بس الحمدلله جت سليمه وماحصلوش اللى كان ممكن يحصلوه لولا الشباب اللى كانوا هناك اللى انقذوه فى اخر لحظه

    الشباب الحقيقى اللى كانوا السبب فى الثوره الحقيقيه اللى فعلا بيخافوا على البلد ديه وعلى رموزها مش البلطجيه المتأجرين اللى رايحين

    علشن يخربوها او مبعوتين من حد مخصوص علشان تامر وبعد كدة روحوا بيوتهم هاه

    كل دة يروح ويفضل برده وغصب عن اى حد

    تامر حسنى فنان مصرى بيعشق تراب بلده وفخور انه مصرى وبيعلن دة فى كل حته وفى كل مكان وهو فخور وبيفتخر بـ مصريته

    وهيفضل مع الشباب اللى كانوا السبب فى الثوره ديه وبيساندهم زى ما هما طلبوا وزى ما كانوا نفسهم يحصل من كل الفنانين

    احب اقولهم ان تامر معاهم قلبا وقالبا ويوم ما هايحتاجوه ولو لـ لحظه مش هيتردد ثانيه انه ينزل تانى ومش هيخاف من شويه البلطجيه اللى مندسين وسط شبابنا

    واحد بسبب انه عايز يبقى مع الشباب دول لغى نص التور بتاعته فى اوروبا ودفع شرط جزائى اكتر من مليون دولار واللى ناس كتير مايعرفهوش انه احتمال هيدفع ادهم تانى لان فى حاجات تانيه بعد ما كان اتفق انها تتاجل للاسف هتتلغى وهيتطر هو يدفع الشرط الجزائى بتاعها

    تفتكرروا لو واحد عايز يعمل شو ويكسب تعاطف الناس هيخسر قصاده المبالغ ديه ؟

    ماعتقدش ان فى حد عاقل يعمل كدة لكن تامر لما شاف اللى بيحصل مافكرش بـ عقله وقعد يحسب تامر فكر بـ عواطفه وقلبه ومصريته

    حاجه اخيره بس هوجهها لـ كل الناس الحاقده على تامر ولكل الناس اللى بتحاول تهده

    تامر هيفضل تامر حسنى الفنان المصرى اللى بيرفع علم مصر فى كل حته وقدام كل العالم

    تامر هيفضل تامر حسنى اللى مع كل ازمه كنا بنمر بيها كان بيقف معانا وبيحاول على اد ما يقدر يحلها

    تامر هيفضل تامر حسنى اللى اكتر من 60 فى الميه من حفلاته كانت حفلات خيريه وكل ايراداتها راحت لـ الناس والشعب المصرى

    تامر هيفضل تامر حسنى اللى راح غزه ورفع اسم مصر هناك وسواء صدقتوا او مصدقتوش ساعد فى حل مشاكل كتيره وسوء تفاهم كان حاصل بين بعض الفلسطنين والحكومه المصريه وقتها

    فـ ماتحاولوش انكوا تهدوه لان مش هو اللى هرب ومش هو اللى اول ما المظاهرات حصلت اخد اول طياره على المانيا والتانى اخدلك طياره على دبى واظن الكل فاهم انا بتكلم على مين

    دول اللى يتحاسبوا مش تامر

    دول اللى يتعاقبوا مش تامر

    دول اللى يستاهلوا الشنق مش تامر

    هنفضل معاك وهتفضل معانا لاخر المشوار

    هنفضل مع الشباب الحقيقى اللى عمل الثوره ديه

    هنقف معاهم بكل ما نقدر عليه علشان نحميهم

    كلمه اخيره لـ تامر

    دموعك اللى نزلت النهارده ديه يا تامر اكبر دليل على خوفك للبلد

    احنا جمهورك اللى معاك من اول ما بدات ولسه معاك لحد دلوقتى وبنطمنك وبنقولك اللى عملته دة هو الصح وماتندمش على اللى حصل

    دول مش مصريين ولا مننا ولا بيحبونا دول كل همهم انهم يخربوا البلد وعايزين رموزها كلها يقعوا علشان هما يحكموها ويرجعونا ملايين السنين ورا

    بنحبك يا تامر وبنحب مصر

    بنحبك يا تامر لانك مصرى

    بنحبك يا تامر لانك وطنى

    بنجبك يا تامر وبنحب فيك خوفك على بلدك








    ===========================

    الى الذين ينتظرون سقوطي .. انا لن اسقط ولكن اذا سقطت !! سأجعل من ضجيج سقوطي زلزالآ يحرق سذاجه قلوبهم


     للمراسله Yoyo@TamerHosny.cN


      الوقت/التاريخ الآن هو الخميس ديسمبر 14, 2017 1:46 pm